Dyfarnwyd Contract IDVA Dyfed Powys i bum asiantaeth cam-drin domestig arbenigol


Mae Comisiynydd Heddlu a Throseddu Dyfed-Powys, ynghyd â’r pedwar Awdurdod Lleol yn rhanbarth Dyfed Powys, (Cyngor Sir Caerfyrddin, Cyngor Sir Ceredigion, Cyngor Sir Penfro a Chyngor Sir Powys), wedi ail-dendro’n ddiweddar ar gyfer y Gwasanaethau Cynghori Annibynnol ar Drais Domestig (IDVA). . Comisiynir y gwasanaeth trwy gyllid gan Gomisiynydd Heddlu a Throseddu Dyfed Powys a Grant Rhanbarthol Trais yn Erbyn Menywod, Cam-drin Domestig a Thrais Rhywiol Canolbarth a Gorllewin Cymru (VAWDASV). Mae’r Bartneriaeth VAWDASV Ranbarthol yn cynnwys y pedwar Awdurdod Lleol, y Comisiynydd Heddlu a Throseddu, Heddlu Dyfed Powys, Bwrdd Iechyd Prifysgol Hwyl Dda, Bwrdd Iechyd Addysgu Powys, y Gwasanaeth Prawf Cenedlaethol yn ogystal â’r darparwyr arbenigol a gomisiynir ar draws y rhanbarth.
Mae pum asiantaeth cam-drin domestig arbenigol, sef Calan DVS, DAS Sir Gaerfyrddin, Canolfan Argyfwng Teuluol Sir Drefaldwyn, Threshold DAS a Gwasanaeth Cam-drin Domestig Gorllewin Cymru wedi cydweithio i ffurfio partneriaeth Dal I Godi.
Mae gan yr asiantaethau cam-drin domestig arbenigol sy'n rhan o Dal I Godi 148 mlynedd o brofiad ar y cyd o ddarparu gwasanaethau cam-drin domestig. Bydd ffocws Dal I Godi ar ymyrraeth gynnar, atal, amddiffyn a chefnogi unigolion a theuluoedd sy’n profi cam-drin domestig, gan ddefnyddio model gwasanaeth sydd wedi’i gynllunio i sicrhau profiad cyfannol, diogel sy’n canolbwyntio ar yr unigolyn ac sy’n cael ei arwain gan anghenion. ar gyfer pob defnyddiwr gwasanaeth.
Prif ddiben y gwasanaeth IDVA yw mynd i’r afael â diogelwch dioddefwyr sy’n wynebu risg uchel o niwed gan bartneriaid agos, cyn-bartneriaid neu aelodau o’r teulu, er mwyn sicrhau eu diogelwch a diogelwch eu plant. Wrth ddarparu gwasanaeth i ddioddefwyr sy'n oedolion, bydd pob gofal yn cael ei gymryd i sicrhau y darperir cyngor ac atgyfeiriad priodol i ddiogelu unrhyw blant dibynnol. Gan wasanaethu fel prif bwynt cyswllt dioddefwr, bydd IDVAs yn gweithio gyda'u defnyddwyr gwasanaeth o'r pwynt argyfwng i asesu lefel y risg, trafod yr ystod o opsiynau addas a datblygu cynlluniau diogelwch a chefnogaeth unigol. Bydd y gwasanaeth yn annibynnol, yn gynhwysol, yn gyfrinachol ac yn hyblyg i fodloni holl amgylchiadau unigol gan sicrhau dull gweithredu sy'n seiliedig ar drawma.
Bydd Dal I Godi hefyd yn gweithio'n agos mewn partneriaeth â'r Comisiynydd i helpu i lunio cyfeiriad y dyfodol ar gyfer mynd i'r afael â Thrais yn Erbyn Menywod, Cam-drin Domestig a Thrais Rhywiol yn Nyfed-Powys.
Dywedodd Michelle Whelan, Prif Weithredwr Calan: “Mae Calan DVS a’n partneriaid o fewn consortiwm Dal I Godi yn falch iawn o fod wedi llwyddo i ennill contract IDVA sy’n cwmpasu ardal Canolbarth a Gorllewin Cymru. Fel y sefydliad arweiniol ar gyfer y contract hwn, bydd Calan DVS yn gweithio’n agos gyda’n partneriaid arbenigol sydd oll â dealltwriaeth ddofn o effaith a’r angen am wasanaethau ymatebol ar gyfer dioddefwyr risg uchel cam-drin domestig. Wrth i ni symud ymlaen gyda’r prosiect, blaenoriaeth y bartneriaeth fydd sicrhau bod y gwasanaeth yn hygyrch, yn cael ei arwain gan anghenion ac yn cael ei lywio gan drawma ac felly’n sicrhau ymhellach bod y gwasanaethau’n diwallu anghenion y rhai sy’n eu defnyddio.”
Dywedodd Comisiynydd yr Heddlu a Throseddu Dafydd Llywelyn “Rwy’n falch o gyhoeddi ein bod yn buddsoddi yn y gwasanaeth IDVA rhanbarthol cydweithredol Dal I Godi newydd.
Mae anghenion dioddefwyr wrth galon fy ngwaith fel Comisiynydd yr Heddlu a Throseddu, a bydd y bartneriaeth hon yn darparu gwasanaethau hanfodol i’r rhai sy’n profi cam-drin domestig risg uchel, y mae llawer ohonynt yn arbennig o agored i niwed. Bydd y gwasanaeth yn sicrhau bod dioddefwyr a’u teuluoedd yn cael y cymorth angenrheidiol i’w helpu i wella ac arwain at ddyfodol heb gamdriniaeth.
Mae’r buddsoddiad hefyd yn caniatáu i ni weithio mewn partneriaeth tuag at gyflawni blaenoriaethau fy Nghynllun Heddlu a Throseddu, gan sicrhau’n benodol bod dioddefwyr yn cael eu cydnabod a’u cefnogi.”
Fel partneriaeth, byddwn yn cynnal cyfres o ddigwyddiadau lansio, a bydd rhagor o wybodaeth yn cael ei rhannu drwy gydol mis Mawrth.
I lawrlwytho'r wybodaeth hon cliciwch yma.


